Foreldrakver

Ágætu foreldrar.
Um leið og við bjóðum barnið ykkar og ykkur velkomin í leikskólann viljum við upplýsa ykkur um ýmis atriði sem tengd eru starfsemi skólans og nauðsynlegt er fyrir foreldra að vita.

Leikskólinn er fjögurra deilda skóli og staðsettur við Götustíg 99 í Úthverfi. Húsnæðið er 640 fm. brúttó og rýmin eru fyrir 88 börnum samtímis. Leikskólinn var formlega opnaður 25. mars 1996. Nafn leikskólans er valið af nágrönnum skólans og þar sem nafnið byrjar á „Leik“ fannst leikskólastjóra kjörið að velja nöfn deilda í samræmi við það. Deildarnar heita Furulundur, Lerkilundur, Birkilundur og Grenilundur. Aðalhurð hverrar deildar eru í sérstökum lit til aðgreiningar fyrir sjónskerta og fylgja nöfn deilda litum í samræmi við trjátegundina sem við á. Deildir eru yfirleitt með tveimur aldurshópum ef hægt er að koma því við. Furulundur og Lerkilundur eru með 2-3 ára börnum en Grenilundur og Birkilundur eru með 4-5 ára börnum. Í vetur verða þó nokkur 3ja ára börn á báðum eldri deildum.

Leikskólinn er rekinn af L.R og býður upp á 4-9 tíma viðveru. Leikskólinn er opinn frá 7:30-17:30.

Leikurinn er hornsteinn leikskólastarfsins. Hinn frjálsi og sjálfsprottni leikur er talinn „leikur leikjanna“. Leikurinn felur í sér nám. Hann er kennsluaðferð leikskólakennarans og námsleið barnsins. Við trúum að gott samstarf við foreldra og fjölskyldur barnanna sé forsenda þess að vel takist til í námi hvers barns.

Leiðarljós Leikskólans er: sjálfstæði, vinátta og gleði.

Meginmarkmið Leikskólans eru:

• að barnið hafi trú á eigin getu.
• að barnið beri virðingu fyrir sjálfu sér, umhverfinu og öðrum.
• að börnunum líði vel og þau séu lífsglöð.

Aðlögun, þegar barn byrjar í leikskólanum

Hornsteinn að góðu samstarfi foreldra og starfsfólks leikskólans er lagður í aðlögun barnsins. Góð samvinna og gagnkvæmt traust og trúnaður foreldra og starfsfólks er forsenda þess að leikskóladvöl barnsins verði barninu árangursrík og ánægjuleg.

Þegar barn byrjar í leikskóla er nauðsynlegt að hafa í huga að barnið er að kynnast nýjum aðstæðum, fólki og börnum, læra að vera í hóp, hlýta skólareglum o.fl. Það er einstaklingsbundið hversu langan tíma aðlögun tekur en við gerum alltaf ráð fyrir einni viku / fimm dögum.

Þegar barn hefur fengið leikskólapláss eru foreldrar þess boðaðir á kynningarfund í leikskólanum. Þar er þeim kynnt starfsemi leikskólans, helstu skipulagsþættir, húsakynni og skrifað undir dvalarsamning. Næsta skref er að barnið kemur í aðlögun og hittir deildastjóra og þann einstakling sem tekur á móti því í aðlögun fyrstu daga þess í leikskólanum. Barnið skoðar húsakynni, einkum sína deild og leikur sér smástund. Foreldrar eru með barninu fyrstu stundirnar, fyrstu dagana, en fara svo að draga sig í hlé eftir því sem barnið öðlast meira öryggi og kynnist betur börnum og starfsfólki leikskólans.

Þegar barn svo flyst á milli deilda er fundur haldinn um þessa breytingu sem framundan er hjá barninu, þar kynnir deildastjóri barnsins barnið fyrir verðandi deildastjóra og segir frá hvernig því hefur vegna í skóladvöl sinni. Enn fremur fer barnið í stutta heimsókn á nýju deildina sína tvisvar til þrisvar áður en til flutnings kemur. Upp

Leikskólanám

Leikskólastarf byggist á lögum og reglugerðum um leikskóla og Aðalnámskrá leikskóla. Leikskólinn setur sér sína eigin skólanámskrá. Í námskrá leikskólans er tekið á fjölmörgum þáttum sem barnið er að tileinka sér í samvinnu og samskiptum við aðra í leikskólanum. Leikskóli er uppeldis og menntastofnun þar sem börn þroskast og læra gegnum leik.

Markmið í lögum um leikskóla eru eftirfarandi:

Stefna leikskólans, starfsgrundvöllur

Við leggjum áherslu á virðingu, nálægð, hlýju og umhyggju sem hluta af uppeldisstarfinu. Við leggjum einnig áherslu á sjálfstæði barnsins og leikinn í öllum hans myndum. Í bernsku er það að leika sér sama og að læra og leita sér þekkingar. Rannsóknir staðfesta að börn á leikskólaaldri læra mest og best í leik. Leikurinn er kjarni uppeldisstarfsins í leikskólanum. Frjáls og sjálfssprottinn leikur er hið eðlilega tjáningarform barnsins. Í frjálsum leik eru mikilvægir uppeldiskostir sem geta eflt alhliða þroska barnanna, þ.e. líkams-, tilfinninga-, félags-, vitsmuna-, siðgæðis og fagurþroska. Hann er kennslutæki leikskólakennarans og námsleið barnsins.

Viltu lesa meira um leikinn af vefsíðu Stekkjaráss frá Fanný Heimisdóttur (skoðað 25.júlí 2004)
Leikurinn í Aðalnámskrá leikskóla
Vefsíða Garðasels á Akranesi

Í leikskólanum er barnið í brennidepli, því allt leikskólastarfið snýst um barnið. Þeir þættir sem næst barninu eru og unnið er með í daglegu lífi þess í leikskólanum eru: að klæða sig úr og í, borðhald, svefn og hvíld, hreinlæti, frágangur og snyrtimennska. Auk þess er unnið með ákveðin námssvið sem eru: málrækt. hreyfing, tónlist, myndsköpun, náttúra og umhverfi, menning og samfélag. Leikurinn umlykur þetta allt og tengir hina fjölbreyttu þætti leikskólastarfsins saman. Í leiknum býr frjóangi allra lista og listsköpunar. (Valborg Sigurðardóttir, 1992)

Við leggjum áherslu á opinn efnivið sem ýtir undir ímyndunarafl barnanna, þ.e. skapandi leikefni sem gefur ekki aðeins eina lausn. Ýmiss konar kubbar skipa þar stóran sess, leikur með þá ýtir undir alla þroskaþætti hjá barninu og hvetur það til stærðfræðileikja og hugsunar. Samvinna, samkennd, tillitsemi og ábyrgðartilfinning eru mikilvægir þættir í félagsþroska barna. Leikskólabörn eru daglega í samskiptum í stórum og litlum hópum og eru hvött til að sýna hvert öðru umburðarlyndi og hjálpsemi.
Markmið okkar er að laða fram í fari barnsins: trú á eigin getu, virðingu þess fyrir sjálfu sér og öðrum, og að því líði vel og sé þess vegna glatt í sinni.

Til að leiða starf okkar notum við starfsaðferðir sem kenndar eru við borgina Reggio Emilia á Ítalíu. Í því felast meðal annars að við horfum á barnið sem getumikinn, sjálfstæðan einstakling og byggjum á sterku hliðum þess. Við notum uppeldisfræðilega skráningu sem tæki til að fylgjast með þeirri þróun sem á sér stað hjá hverju barni. (Bók barnsins)

Um Iðjuskráningu á vef Fannýjar Heimisdóttur (skoðað 25.07.04) Upp

Fyrirmyndir - fræðimenn

Við sækjum fyrirmyndir í starfinu til fræðimanna eins og Vygotsky. Í boði eru verkefni sem börn ráða auðveldlega við og einnig verkefni sem krefjast þess að börnin prófi eigin getu og takist á við eitthvað sem þau þurfa aðstoðar við (Svæði mögulegs þroska).
Dewey hjá okkur er stefnan að leyfa börnunum að bjarga sér sjálf í sem flestum athöfnum, við dagleg störf, leik eða lausn verkefna. Það leiðir af sér að þau rekast á ýmis vandamál sem þau þurfa að leysa sjálf. Þá reynir á þeirra eigin hugmyndir og færni í samvinnu og samskiptum og hægt að efla virðingu þeirra fyrir sjálfum sér og öðrum.
Carsten Jessen
Tölvur eru að koma inn í leikskólastarfið og lítum við þar til hugmynda Carsten Jessen og setjum tölvur inn sem eitt af leikföngum barnanna.
Malaguzzi og Piaget.
Nú erum við að móta vinnulag sem einkennist af því að hver og einn er nokkuð frjáls í vinnu sinni bæði starfsfólk og börn, þetta krefst frumkvæðis og áhuga á því sem við erum að gera. Stuðla þarf að því að börn öðlist sterka og góða sjálfsmynd, það þarf að hvetja þau til að tjá sig og standa á eigin skoðunum. Þau eru hvött til að tjá sig og segja frá. Stig af stigi öðlast þau færni í lausn vandmála. Við notum uppeldisfræðilegar skráningar og börnin eru spurð opinna spurninga hvar, hvað, hvernig og hvers vegna. Verkefnavinna er spunnin út frá hugmyndum barnanna. Þarna er þreyfað á hugmyndum Malaguzzi og Piaget.
Hvetja þarf börnin til að að leysa sjálf úr deilum, spyrja opinna spurninga, reyna að fá þau til að koma með tillögur t.d. Hvað heldur þú að sé best að gera? hjálpa börnunum að orða hugmyndir. Þetta er í anda Kamii og DeVries.

Daglegt líf í leikskólanum

Eins og fram hefur komið fléttast námsvið og námsþættir inn í daglegt líf og leik barnsins. Börnin hjálpa sér sjálf eftir því sem þroski þeirra og geta leyfa, það eykur sjálfstæði þeirra og styrk. Umönnun og heilsuvernd stuðlar að almennri vellíðan barnsins. Leikskólastarfinu er skipt í ýmiskonar leik-, náms- og samverustundir. Dagskipulag skólans og ákveðnar tímasetningar gefa starfinu ákveðna festu og veita öryggi.

Leikskólinn er opinn frá kl. 7:30 til kl. 17:30

07:30-08:00 Leikskólinn opnar á Furulundi
08:00-09:30 Opnað á öðrum deildum, frjáls leikur
08:15-08:45 Morgunverður
09:30-10:00 Samverustund, ávextir eða grænmeti í boði
10:00-11:30 Vinnustund, hreyfing, tónlist, þema, útivera
11:30-12:00 Söngstund og undirbúningur fyrir hádegisverð
12:00-12:30 Hádegisverður
12:30-13:00 Hvíld og svefn
13:00-14:30 Vinnustund, hreyfing, þema, tónlist, útivera
14:30-14:50 Söngstund og undirbúningur fyrir síðdegishressingu
14:50-15:15 Síðdegishressing
15:15-17:00 Frjáls leikur úti eða inni
17:00-17:30 Skilað á Furulundi

Máltíðir

Matartímar og borðhald hafa mikið uppeldislegt gildi. Áhersla er á hollt, fjölbreytt og gott fæði. Máltíðin á að vera notarlegur tími þar sem allir sitja kyrrir við borð og tími gefst til umræðna t.d. um hollustu, tannhirðu, atburði líðandi stundar og það sem kviknar í kolli hvers barns. Starfsfólk matast með börnum og áhersla er á að börn læri almenna borðsiði. Þau leggja á borð, skammta sér sjálf, nota hníf og gaffal, hella í glasið sitt og ganga frá. Þetta er þáttur í uppeldi til sjálfstæðis og sjálfsbjargar. Hvert barn fær að vera stolt af frammistöðu sinni.

Svefn

Svefn og hvíld er öllum börnum nauðsynleg. Lögð er áhersla á að skapa rólegt og afslappað andrúmsloft í hvíldinni. Eldri börnin hlusta á sögur eða tónlist en yngri börnin sofa eins og þau þurfa eða eftir leiðsögn/óskum frá foreldrum.

Samverustundir

Samverustundir gegna mikilvægu hlutverki í félagsþroska og málörvun. Í samverustundum eru lesnar sögur, sagðar sögur, sungið, farið með rím og þulur, farið í leiki og rætt saman. Börnin tjá sig og læra að hlusta á aðra. Ýmis fræðsla tengd menningu og listum er til umfjöllunar svo og heiti daganna, mánaða, veðrátta og tíðarfarið rætt í tengslum við árstíðir. Þetta er eins konar einbeitingarstund þar sem börnin eru krafin um að vera kyrr og hljóð í hlustun en þau eru líka hvött til samræðna og þátttöku í leikjum, frásögnum og spjalli. Upp

Hreinlæti

Hreinlætisþjálfun er hluti uppeldisstarfs og náms barnsins, þeim er hjálpað að tileinka sér góðar venjur, s.s. að þvo hendur fyrir máltíðir, eftir útiveru og salernisnotkun. Þannig þróa þau með sér heilbrigt viðhorf til líkama síns og umhirðu.

Að klæða sig úr og í er liður í námi barnsins. Barnið klæðir sig sjálft og fær hvatningu til þess og stuðning eins og þörf er á. Þetta eykur sjálfstæði barnsins og styrkir sjálfsmynd þess.

Frágangur og snyrtimennska er enn einn liður í menntun barnsins. Þau eru þátttakendur í undirbúningi ýmissa verkefna og atburða. Það er einnig lögð áhersla á að þau læri að ganga frá leikföngum og efnivið sem þau eru með hverju sinni. Þetta eflir sjálftæði og trú á eigin getu.

Útivera

Útivera er mikilvægur þáttur í leikskólastarfi jafnt sumar sem vetur. Útivera styrkir börn og eflir, eykur matarlyst og býður upp á góða hreyfingu. Í útiverunni gefast ótal tækifæri til náms. Börnin skynja nánasta umhverfi sitt og læra að meta það og umgangast. Veðrátta á Íslandi er rysjótt og umhleypingasöm og börn verða að venjast því að vara úti í alls konar veðri. Leikskólalóðin gefur tækifæri til alls konar leikja. Til að gæta fyllsta öryggis á lóðinni er henni skipt niður í 3-4 svæði og starfsmenn hafa umsjón með hverju svæði fyrir sig.

Vettvangsferðir

Ferðir út fyrir leikskólann auka víðsýni barna og gefa færi á að kynnast umhverfi og menningu. Börnin fara ýmist í stórum eða smáum hópum í stuttar eða lengri ferðir. Oft tengjast ferðirnar þemastarfi.

Hópastarf / þemavinna

Hópvinna eflir félagsþroska, markmið hennar er að börn læri að starfa í hóp að sameiginlegu verkefni, þau öðlist samkennd og myndi vináttutengsl, að þau geti hjálpað hvert öðru og beri virðingu fyrir verkum og skoðunum annarra. Börnin læra að bera traust til vina sinna en það er grundvöllur að góðu samstarfi. Börnum er skipt niður í hópa eftir aldri og þroska og verkefnin miðuð við hvern aldurshóp. Miðað er við að sami starfsmaður vinni með sama barnahópinn allan veturinn. Þema er eins konar fræðslustef sem fléttast inn í allt starf leikskólans, getur verið í hópavinnu jafnt sem því að þvo sér um hendur eða að klæða sig í fötin. Í hópavinnu er líka unnið að líkamsrækt, tónlist og menningu.

Val

Val á viðfangsefnum stuðla að sjálfræði og sjálfstæði barnsins, það gefur og kost á fjölbreyttum viðfangsefnum og nýtir vel húsnæði og búnað leikskólans. Það grundvallast á áhugahvöt og virkni barnsins. Val er á hverjum degi í frjálsa leiknum, þá velur barnið sér viðfangsefni eftir áhuga hverju sinni.

Heiltæk skólastefna - Sérkennsla Upp

Leikskólinn er fyrir öll börn á leikskólaaldri óháð gæfu og gjörvileika. Það er talinn ávinningur fyrir alla að eiga fjölbreytt samfélag. Markmið sérkennslunnar er að barnið geti notið leikskóladvalar sinnar og það er stutt til þroska eins og kostur er og undir handleiðslu kennarans. Lögð er áhersla á að sérkennsla fari fram í barnahópnum eða í smærri hópum en börnin ekki tekin út úr hópnum til að örva þá þætti sem þarf. Í leikskólanum er öllum börnum kennt „tákn með tali“ og það sérstaklega notað til að styðja börn með málhamlanir og börn sem þarf að efla í samskiptum.

Lífsleikni

Með lífsleikni er átt við hæfni til að takast á við lífið sjálft í samskiptum við aðra. Leikskólanámið er í raun samfellt lífsleikninám. Til að öðlast þessa færni þarf barnið að læra umburðarlyndi, læra að bera virðingu fyrir óliku atgerfi, skoðunum og menningu. Vinátta og samkennd er dýrmætt veganesti og góður undirbúningur undir virka þátttöku í félagslífi og samstarfi síðar í lífinu. Barninu eru kennd lýðræðisleg vinnubrögð, (þ.e. til dæmis ekki rífa af öðru það verður að fá samþykki) það fær tækifæri til að leysa deilur á jákvæðan og friðsamlegan hátt, lærir að gleðjast með öðrum og lifa í sátt við sjálft sig og umhverfi sitt. Daglegar venjur gefa uppeldisstarfinu reglubundið form sem skapar öryggi og festu í lífi barnsins í leikskólanum.

Samstarfsaðilar

Leikskólinn hefur samstarf við ýmsa aðila. Hér er verið að tala um skóla, heilsugæslu, sálfræði- og ráðgjafaþjónustu og barnaverndaryfirvöld. Ráðgjafaþjónusta kemur einkum úr Miðgarði en einnig frá RÁS deildinni á Leikskólum Reykjavíkur. Ennfremur hefur ráðgjafaþjónusta komið frá talmeinafræðingum og Greiningastöð Ríkisins.
Samvinna við grunnskóla er mikilvægur þáttur og hefur það að markmiði að auðvelda barni að flytjast milli skólastiga. Flest börn í þessum leikskóla fara í hverfisskólann Rimaskóla, þó eru alltaf nokkur sem fara í hina skólana í kring. Samstarf við Rimaskóla hefur verið í þróun og fer í nokkuð ákveðinn farveg næsta vetur. Á haustönn verður bókasafn Rimaskóla heimsótt þar sem safnakennari tekur á móti hópnum og kynnir fyrir nemendum okkar. Möguleiki er á að börnin okkar fá að koma í leikfimitíma í litlum hópum með 6 ára nemendum Rimaskóla. Á „Degi íslenskrar tungu“ 16. nóvember koma nemendur 4. bekkja Rimaskóla til okkar og lesa sögu fyrir okkar börn. Möguleiki er ennfremur á að leikskólabörn fari í desember með jólasöngva í Rimaskóla. Dagana 1.-11. mars verða heimsóknir leikskólabarna í Rimaskóla þar sem skólastjóri tekur á móti okkar börnum og kynnir sig fyrir þeim og skólann sinn. Í maí verða svo okkar nemendur boðaðir í fylgd foreldra sinna í heimsókn í grunnskólann.
Engjaskóli hefur líka boðið upp á samstarf eða heimsóknir að vori.

Foreldrasamvinna

Lykilatriði í öllu starfi leikskólans er gott og traust samstarf við foreldra. Við viljum að samskipti við foreldra byggi á trausti og trúnaði, þar sem áhersla er lögð á góða samvinnu, til farsældar fyrir barnið. Hlustað sé á óskir foreldra og leitast við að veita þeim góða þjónustu. Foreldrum er boðið í morgunkaffi í leikskólanum 13. desember eða sem næst honum, þar sem þeir hlýða á elstu börnin syngja Lúsíusöng að sænskum sið.
Þegar Lúsíusöngurinn byrjaði voru hér þrír starfsmenn sem höfðu búið og alist upp í Svíþjóð, þeir hvöttu mjög til að gera þetta að sið og það hefur haldist síðan.
Við stefnum á að vera með sýningar einstakra hópa barna eftir þemavinnu hjá þeim, þar sem þau kynna vinnu sína fyrir foreldrum sínum.

Foreldraviðtöl

Foreldrar eru boðaðir í formleg viðtöl tvisvar á ári í október og mars. Tilgangur foreldraviðtala er að veita gagnkvæmar upplýsingar um barn, líðan þess og framgang. Þess utan eru viðtöl eftir þörfum bæði foreldra og starfsmanna.

Foreldrafundur

Foreldrafundur er haldinn að hausti þar sem vetrarstarfið er kynnt. Ennfremur er fundur með foreldrum nýrra barna að vori og opið hús. Foreldrafélagið hefur ennfremur boðið upp á fræðslufund á vorönn í samvinnu við foreldrafélög leikskólanna í hverfinu. Upp

Fréttabréf

Fréttablað leikskólans heitir Laufblaðið og hefur komið út tvisvar til þrisvar á ári auk smærri fréttatilkynninga. Í blaðinu eru upplýsingar um starfið framundan og almennar hagnýtar upplýsingar.

Upplýsingatafla

Tafla er í anddyri leikskólans og er ætlað að koma á framfæri upplýsingum til foreldra. Ennfremur eru upplýsingatöflur fyrir faman deildar þar sem koma fram upplýsingar um daglegar athafni barnanna.

Foreldrafélag

Foreldrafélag er starfandi og hefur það að markmiði að stuðla að velferð barna með því að vinna:

• að aukinni samvinnu foreldra og starfsfólks.
• að samvinnu foreldra innbirðis um starfsemi og aðbúnað leikskólans.
• að því að leggja hagsmunum barna lið bæði innan skólans og utan hans.

Foreldrar greiða ákveðna upphæð í sérstakan sjóð sem notaður er til að auðga starfið t.d. með ferðum, leiksýningum og ýmsu öðru. Stjórn foreldrafélags er skipuð tveimur foreldrum af hverri deild. Aðalfundur félagsins er haldinn að hausti. Þá eru reikningar félagsins lagðir fram og kosið í nýja stjórn.

Hagnýtar upplýsingar

Að koma og fara leikskólinn leggur áherslu á að taka vel á móti börnunum og kveðja þau fallega þegar þau fara. Foreldrum ber að fylgja barni sínu inn á deild þegar það kemur í leikskólann og láta örugglega vita þegar barn er sótt. Mikilvægt er að foreldrar gefi sér tíma með barninu þegar komið er og einnig þegar það er sótt til að barnið geti lokið sínu verkefni og gengið frá. Foreldrum ber að virða þann dvalartíma sem samið hefur verið um. Ætlast er til að barnið mæti tímanlega og reglulega í skólann svo það missi ekki af mikilvægum þáttum í leikskólastarfinu. Ef barnið er að koma inn í verkefnavinnu sem hafin er, er það mjög erfitt fyrir alla aðila og kannski einkum fyrir barnið sjálft, þá geta starfsmenn ekki einbeitt sér að móttöku barnsins.

Afmæli er alltaf stór viðburður hjá hverju barni og er haldið upp á daginn með barninu, börnin mega koma með snakk eða popp á afmælum til að bjóða vinum sínum og er það í þágu sykurskerðingar að ekki er leyfilegt að koma með sætar kökur eða slíkt. Þegar barn hættir í leikskólanum er leyfilegt að koma með köku sem boðin er í síðdegishressingu.

Persónulega hirslan er skúffa fyrir hvert og eitt barn leikskólans. Enginn hefur leyfi til að fara í skúffuna nema samið sé um slíkt. Í skúffunni geymir barnið persónulega muni sem koma stundum með í leikskólann s.s.myndir af fjölskyldu sinni eða smáhluti að heiman sem barninu þykir vænt um og veitir því öryggiskennd. Þar er einnig stundum geymd myndverk eftir börnin sem þau geta tekið með sér heim ef þau vilja.

Leikföng að heiman, bangsar, geisladiskur eða bók. Þeir hlutir sem barnið kemur með að heima verða að komast í skúffuna þeirra. Stillið öllu slíku í hóf. Ekki er leyfilegt að vera með leikföng sem geta valdið slysi að mati starfsfólks, svo og stríðsleikföng. Leikskólinn tekur ekki ábyrgð á leikföngum að heiman.

Klæðnaður barna þarf að hæfa veðri, vera þægilegur fyrir börnin til að þau geti hjálpað sér sjálf, geti auðveldlega hreyft sig í þeim og klætt sig úr og í. Nauðsynlegt er að hafa fatnað til skiptanna og að allt sé vel merkt. Í leikskólanum er unnið með allskonar efnivið, málningu liti og lím. Takið tillit til þess. Þau börn sem nota bleijur koma með þær sjálf. Hólfin í fataklefa þarf að tæma á föstudögum vegna þrifa.

Óhöpp, slys og veikindi. Börn eru ekki tryggð í leikskólum hjá L.R. en borgin tekur ábyrgð á slysum og óhöppum samkvæmt almennum tryggingarskilmálum og þurfa foreldrar að snúa sér til lögfræðings í Ráðhúsi Reykjavíkur ef slíkt kemur upp. Ef barn slasast er haft samband við foreldra og lýst fyrir þeim hvað gerðist, metið hvort foreldrar þurfi að sækja barn sitt til að koma því undir læknishendur. Leikskólinn greiðir tvær heimsóknir til læknis eða á slysadeild hvert sinn sem slíkt kemur upp.
Ef barn veikist er haft sambands við foreldra og þeir beðnir um að sækja barn sitt. Ef barn þarf á lyfjagjöf að halda er mikilvægt að haga lyfjagjöf þannig að lyfin séu gefin heima, en ekki í leikskólanum.

Fjarvistir barna þarf að tilkynna skólanum samdægurs, síminn er 587-1140.

Breytingar á högum barns sem geta haft áhrif á líðan þess, þarf að upplýsa starfsmenn viðkomandi deildar eða leikskólastjóra um. Foreldrum ber að tilkynna breytingar á heimilisfangi, símanúmer, vinnusíma og breytta hjúskaparstöðu, ennfremur er mikilvægt að upplýsa um alvarleg veikindi og/eða dauðsfall, til að við getum brugðist við spurningum og vangaveltum barnsins.

Dvalartímar barna er misjafn eftir þörfum foreldra. Foreldrum ber að virða þann dvalartíma sem samið er um og vinnutími starfsmanna er miðaður við fjölda barna hverju sinni og því aukið álag ef miklar breytingar eru endalaust að koma til.

Leikskólinn er lokaður þrjá daga á ári vegna skipulagsdaga starfsmanna. Þeir eru sérstaklega auglýstir með þriggja vikna fyrirvara og í ársáætlun. Skipulagsdagar eru nýttir til að skipuleggja, undirbúa og endurmeta starfið. Þeir nýtast einnig til námskeiðs og fyrirlestra. Nú í ár er lokað í hálfan mánuð vegna sumarleyfa. Börnum er skylt að taka fjórar vikur samfellt í sumarfrí. Könnun er gerð á sumarleyfisþörf foreldra í febrúar ár hvert og lokun ákveðin út frá því.

Heimild
Aðalnámskrá leikskóla. 1999, Reykjavík. Menntamálaráðuneytið
Hrafnh. Sig, Selma Dóra, Svandís 1992. Leikur og leikgleði. F.Í.
Iðjuskráning. http://www.ekra.is/fanny/idjuskraning/index.htm
Leikurinn. http://www.hafnarfjordur.is/stekkjaras/Leikurinn.htm
Könnunarleikur. http://www.akranes.is/gardasel/konnunarleikur.html