UT2003

UT2003 Akureyri

UT2003

Nú ætla ég að segja ofurlítið frá þeim fyrirlestrum sem ég sótti á Akureyri. Fyrst hlustaði ég á fyrirlestur hjá Arndísi Bjarnadóttur um reynslu af tölvunotkun í Múlaborg. Þá hlustaði ég á Sigurð Fjalar Jónsson. Hann fjallaði um Margmiðlun í kennslu nemenda með sérþarfir. Einnig hlustaði ég fyrirlestur hjá Margréti og Þór. Þau fjölluðu um UT endurmenntun á forsendum hugsmíðahyggju. Svo var það NámUST frá leikskóla til háskóla og að lokum Kristlaug Svavarsdóttir og Arnar Yngvason „Iðavöllur, tölvurnar og framtíðin“. Mér fannst margt af þessu mjög merkilegt, en ég hef valið að fjalla nokkuð nánar um fyrirlestur Margrétar og Þórs og Kristlaugar og Arnars.

Fyrirlestur Margrétar og Þórs.

Um endurmenntun á forsendum hugsmíðahyggju ber keim af uppgötvunarnámi að mínu mati. Fólk verður að fá tækifæri til að skilja og reyna hlutina til að geta unnið áfram með þá. Skipulag og framkvæmd námskeiðanna eru með þeim hætti að þau eru haldin á starfsvettvangi þátttakenda og á starfstíma skóla. Reynt er að taka eins mikið mið af aðstæðum þátttakenda og unnt er. Námskeiðin fela í sér bæði staðbundið nám og fjarnám. Í staðbundna hlutanum fara fram umræður í hópum, skipulagning námsáætlana og kennsla á tölvur. Þátttakendur eru þess á milli í sambandi við leiðbeinendur og þeim er boðið upp á aðstoð í fjarnámi. Námskeiðstíminn er ein önn. Gert er ráð fyrir tveimur staðbundnum lotum í tölvuveri á námskeiðstímanum. Námskeiðin hefjast með erindum almenns eðlis um skólaþróun og þróun kennara í starfi þar sem grundvallarsjónarmið eru viðruð í þeim tilgangi að auka skilning þátttakenda á vinnunni framundan. Lögð er áhersla á samvinnu, jafningjafræðslu og þarfir þátttakenda. Námskeiðin fjalla um: „Bekkjarvef til náms og samskipta“. Þar er meginmarkmið að átta sig á gildi bekkjarvefja í skólastarfi og þeim fjölþættu tækifærum til náms og samskipta sem bjóðast við uppbyggingu og viðhald þeirra. „Snemma beygist krókur UT á yngsta stigi grunnskólans“, Þar er meginmarkmið að kennarar velti fyrir sér og nýti möguleika upplýsingatækninnar til að efla móðurmálsnám yngstu nemendanna. „Upplýsingalæsi og upplýsingatækni samofin öðru námi“ Þar er meginmarkmið að auka færni kennara í að samþætta markmið upplýsinga- og tæknimennta inn í dagleg viðfangsefni nemenda. „Vefnaður og Internetið vefsmíði og netið í námi og kennslu. Þar er meginmarkmið að gefa kennurum tækifæri til að tengja möguleika Netsins og vefsíðugerðar í kennslu og að þeir öðlist nokkra færni í vefsmíði“. Upplýsingatækni í hefðbundnu, greinabundnu námsumhverfi“ Þar skulu kennarar nýta möguleika upplýsingatækni í einstökum verkefnum innan námsgreina“. Sem dæmi var tekið að þegar kennarar eru að átta sig á vefsmíði og vefjagerð þá eru þeir látnir byrja á að föndra vefinn gera „banner“ gera „hnappa“ gera fyrirsögn o.s.frv. Þeir þurfa að átta sig á hvernig tengist vefurinn þvers og kruss. Þá fá þeir bandspotta til að skilja tengingu. Fyrirlesarar spyrja sig: „Á hvaða kennslufræðilega þætti ber að leggja áherslu í námi út frá sjónarmiðum Aðalnámskrá- upplýsinga- og tæknimennta“. Þau segja að nemendur þurfi að fá þjálfun í að velja sér og bera ábyrgð á sjálfvöldum viðfangsefnum. Fá þjálfun í að spyrja viðeigandi spurninga. Fá þjálfun í að leggja á ráðin um lausn viðfangsefna. Fá tækifæri til að láta sér detta í hug viðeigandi upplýsingaveitur. Fá þjálfun í að átta sig á hvaða upplýsingar eru verðmætar. Fá þjálfun í því á hvaða form passar best að setja niðurstöður og þjálfun í að skíra frá niðurstöðum sínum. Fá þjálfun í að tjá sig um og meta vinnuframlag sitt. Hér er komin greinagerð um einn fyrirlestur sem mér fannst mjög athygliverður og til eftirbreytni fyrir starfsmenn leikskólageirans. Ég sé tækifæri til að upplýsa starfsmenn og fer af stað með þankagang þar að lútandi. Besti kostur væri auðvitað að allir starfsmenn fengju fjarnám með sinni vinnu og á sínum hraða ég læt mér dreyma um það. Ég ætla að geyma umsögn um hinn fyrirlesturinn til morguns. Upp

Fyrirlestur Kristlaugar og Arnars.

Leikskólinn Iðavöllur hefur unnið með tölvur síðan 1998. Litið er á tölvuna sem leikfang og verkfæri. Hugmyndin er að tölvan sé frjáls og ótengd, að tölvan sé þáttur í leik barnanna eða verkfæri fyrir börn og starfsmenn. Starfsmenn nýta áhuga barnanna hverju sinni og hafa tölvu sem úrvinnslutæki. Þetta finnst mér athyglivert og vil hafa þennan háttinn á í tölvuvinnunni í mínum leikskóla, þegar allt verður orðið virkt hjá mér. Það sem skiptir máli er að vera að vinna með börnum ekki hvað tæknin getur eða gerir. Dæmi: um dordingul sem börnin fundu í skólahúsinu. Þau fengu áhuga á dýrinu og það var farið með dýrið í tölvusmásjá og það skoðað í bak og fyrir stækkað og snúið. Sögur eru sagðar með tölvum, það er börnin segja sögur og þær eru ritaðar inn í tölvuna. Hvað framtíðina snertir þá er tölvan tæki í nútíðinni og við vitum ekki hvað verður. Í dag eru starfsmenn og börn að hagnýta tölvuna í starfinu. Tölvur eru tæki í nútíðinni -- takmarkið er að móta góða einstaklinga með jákvæða sjálfsmynd. Það skiptir máli. Þetta finnst mér vera mikilvægt.
Í dag eru 13 tölvur í leikskólanum, 4 fyrir börn eingöngu, 4 fyrir börn og starfsmenn og 4 fyrir starfsmenn í vinnuherbergi. Ein hjá leikskólastjóra. Hluti af þeim eru leigutölvur. 10 tölvur eru nettengdar innanhúss, það auðveldar samskiptin og sameiginleg gögn eru geymd á móðurtölvu í samgagnamöppu. 10 tölvur eru nettengdar ADSL. Einn prentari er í húsinu samnýttur. Svo eru ýmiss konar jaðartæki.
Í dag er í tölvunum ritvinnsluforrit, töflureiknir, publisher, myndvinnsluforrit, og fleira. Heimasíða hefur verið til frá 1999. Leikskólastjóri vann hana, en í dag eru 6 vefir fyrir leikskólann. Heimasíða, deildir og síða sem heldur utanum þróunarverkefni.Meiningin er að koma upp sérkennsluvef
Leikskólastjóri er verkstjóri í vefjagerð en starfsmenn deilda sjá um deildavefi. Allir starfsmenn eru með tölvupóstfang. Í framtíðinni eru starfsmenn með ýmsar hugmyndir um aukna nýtingu til samskipta við foreldra og aðstandendur. Starfsmenn eru byrjaðir að vinna myndir á geisladisk um hvert barn, sem það fær svo í lok leikskóladvalar. Það eru unnar ýmsar viðhorfskannanir og niðurstaða sett á vefinn. Í dag eru starfsmenn með samskipti við foreldra í gegnum tölvupóst og það eru 94 af 114 foreldrum með tölvusamskiptamöguleika. Þessi leikskóli hefur litið til kenninga Carsten Jessen og vinnur samkvæmt hugmyndum hans. Carsten leggur áherslu á tölvuna sjálfa sem efnivið í leik án þess að leggja mikla áherslu á að ná tökum á tækninni eða færni í einstökum forritum. Hann heldur því fram að færnin komi einmitt samfara því að leika sér með tölvuna. Netfang skólans er Iðavöllur. Þar er hægt að skoða hinar ýmsu síður skólans. Þarna er að mínu mati verið að vinna merkilegt frumkvöðlastarf í leikskólanum. Ég tel margt gott í þessari vinnu en alltaf eru það starfsmenn sem setja hraðanum takmörk. Þeir eru svo aftarlega á merinni í kunnáttu enda ekki nema von, börnin hins vegar verða trúlega ekki slíkir dragbítar þegar þeim vex fiskur um hrygg.

Upp